Pageviews all the time

RWANDA.Rucumbeka yateye Dr Pierre Damien HABUMUREMYI kwadukana NDI UMUNYARWANDA niyo yubikiye imbehe uwari umunyamabanga uhoraho muri Minisiteri y’ububanyi n’amahanga : MAKUZA Michel nyuma y’uko ategetswe ku gahato gusaba imbabazi ku magambo yavuzwe na se MAKUZA Anastase mu 1957

Michel Makuza
Wagira ngo Imana yavugiye muri Dr NKUSI Yozefu gutangiza uru rubuga SHIKAMA rwanyu mukunda muri benshi yari izi ko rwose azabera abanyarwanda umuhanuzi uvuga ibigiye kuba maze akavuza impanda kugirango zumvikane hose bityo abahindura imikorere mibi bagana mu myiza bikubite agashyi inzira zikigendwa.
Ejo hashize mu gicuku nibwo twarimo dushyashyana tubategurira inkuru ku bushakashatsi bwakozwe na Dr Petero Damiyani HABUMUREMYI ubu wagororewe kuba Minisitiri w’intebe yirukanishijeho Bwana MAKUZA Bernard. Muri ubwo bushakashatsi niho hakomotse NDI UMUNYARWANDA.
Muri iyo nkuru twasobanuye birambuye ukuntu ifumba abakoloni badusigiye ihwekereye y’umunyotwe maze abanyapolitiki n’uyu munsi bakaba bakiyiyambaza mu kwigizayo abo badashaka. Mu gihe muri SHIKAMA twarimo twandika iyo nkuru, muri Village Urugwiro naho inama y’abaminisitiri yari irimbanije rugeretse.
Ibyemezo bitatu biteye agahinda no kwibazwaho :
Muri iyi nama y’abaminisitiri yari iyobowe na Perezida KAGAME Paul yateraniye mu Rugwiro kuri uyu wa Gatanu taliki 28 Werurwe 2014 yarimo na Minisitiri w’Intebe Dr Petero Damiyani Habumuremyi n’abaminisitiri bose uretse Minisitiri Cheikh MUSA Fazil Harelimana w’umutekano mu gihugu uri mu butumwa bw’akazi hanze y’igihugu.
Icyemezo cya 1 : MAKUZA Michel yirukanywe kuri P.S muri MINAFFET
Twongeye kubibutsa gato ni uko mu 1957 ubwo abasore b’abahutu bari basohotse mu Iseminari nto y’i Kabgayi biyumvagamo ubushyuhe bwo kuzana impinduramatwara, Musenyeri Perraudin Andrea yabateye imboni niko kubegera bibaruka impinduramnatwara ya rubanda mu 1959.
Muri abo basore harimo na MAKUZA Anastase ubu Kagame n’agatsiko ke birirwa bakiniraho bashinyagurira urubyaro rwe muri Kigali. Muri 1957 MAKUZA Anastase yagize ati : « Eeeeehhhhhh, urebye abatutsi nibo bacyeya cyane kuko bangana na 14% by’abanyarwanda kandi bakaba barategetse rubanda nyamwinshi rw’abahutu kandi iyo rubanda nyamwinshi ikabaaaaaa ariboooo twakwitaaaaa abanyarwanda b’umwimerere.»
Ubwo tubigaruye mu mvugo yumvikana y’ab’iki gihe ni ukuvuga ko MAKUZA Anastse yashakaga kuvuga ko abahutu aribo banyarwanda nyakuri naho abatutsi bakaba ? ?????????? Ni akumiro koko !!!!!!!!!!!!!!!! Kagame amaze kureba ya nkuru –mashusho (FILM) ya NDI UMUNYARWANDA yateguwe na HABUMUREMYI natwe muri SHIKAMA tukaba tuyifitiye kopi, yabwiye abajyanama be kwihutira gusaba bene MAKUZA Anastase kwaka imbabazi.
Bernard MAKUZA
Mu gihe Musenyeri John RUCYAHANA we mu gusoza inama y’iguhugu yo kurya, kunywa no kwifotoza (Umushyikirano 2013) yasobanuye ko abazemera ibyaha bya bene wabo bakabisabira imbabazi hazakurikiraho kubashyikiriza ubutabera ariko akaba yaribagiwe kongeraho ko bazanirukanwa ku mirimo bafite mu gihugu.
Muribuka ko mu mataliki yasozaga ukwezi kwa cumi na kumwe 2013, MAKUZA Michel wari umunyamabanga uhoraho muri Minisiteri y’ububanyi n’amahanga n’ubutwererane bw’akarere yategetswe gusaba imbabazi mu ruhame rw’abakozi bose b’iyi minisiteri akaba yaravuze ko yatse imbabazi ku ijambo se yavuze mu 1957 ari naryo maze kubabwira  kandi tukaba turifite muri SHIKAMA ryose uko ryakabaye n’ubwo we icyo gihe atabwiye abanyarwanda icyo se yavuze.
Bakunzi ba SHIKAMA nimwibuke inkuru twabandikiye ku mugoroba MAKUZA Michel yasabyeho imbabazi kuri iryo jambo rya se. Mu gusoza iyo nkuru Dr NKUSI Yozefu yabasobanuriye ko uyu MAKUZA Michel biganye mu College ya HUMANITES MODERNES i Nyanza(CHM) maze ngo bakagira umwarimu wajyaga akunda kubwira MAKUZA Michel ko ahabyutse ingwe haryama imondo bishatse kuvuga ko abavunikira Revolisiyo ataribo baryoherwa n’ibiyikomokaho n’ibyiza byayo.
Tubaye nk’abasobanura iyo mvugo ya mwarimu mu buryo burushijeho kumvikana kuri buri wese, yashakaga kuvuga ko MAKUZA Anastase na bagenzi be bavunikiye impinduramatwara muri 1959 hanyuma ibyiza byayo bigatapfunwa n’abategekanaga na Habyarimana, n’ibindi nawe wakongeraho.
Twibaze ikibazo : Ese MAKUZA Michel yiyumvishaga ko nasaba imbabazi mu ruhame bizatuma agumana umwanya w’umunyamabanga uhoraho muri MINAFFET ? Niba ariko yabitekerezaga abonye ko yibeshye. Ubu mu nama y’abaminisitiri bahise bamusimbuza umugore kandi we nta wundi mwanya bamugeneye kandi aracyari muto ntarasaza byo kujya muri Pansiyo. Bisobanuye ko yirukanwe!!!
Habumuremyi na Kagame batangiza Ikigega
Agaciro cyakurikiwe na Ndi umunyarwanda
Ubwo rero nk’uko twari twabibatangarije ejo kuri SHIKAMA ni ukuvuga ko azize ijambo rya se kuko abanyarwanda benshi bakomeje kuvuga ko bene MAKUZA Anastase bakwiye guhindurwa ruvumwa mu Rwanda mu gihe ariko twe muri SHIKAMA atariko tubibona.
Niba MAKUZA Anastase yari akiriho niwe wari ukwiye kuza agatanga ibisobanuro ku iryo jambo ariko ubwo atakiriho nihubahirizwe rya hame mpuzamahanga ry’uko icyaha ari gatozi kandi ko ntawe ukwiye kuzizwa icyaha atakoze.   
Icyemezo cya 2 : Maitre Evode UWIZEYIMANA yagizwe umuyobozi wungirije wa Komisiyo y’igihugu ishinzwe gukora amategeko
Uyu Evode UWIZEYIMANA akigera mu Rwanda twabasobanuriye ko twamaze kumenya icenga ry’uko Kagame yamuvanye muri Kanada kugira ngo amugomwe TWAGIRAMUNGU Faustin washoboraga kuzamwifashisha ubwo imishyikirano yazaba igeze aho rukomeye hagati ya FPR na FDLR bitewe n’uko azi amategeko.
Uwizeyimana Evode akiri
Somambike wa Rukokoma
Muri iyo nkuru SHIKAMA yababwiye ukuntu dufite amakuru asobanutse y’uko mu mezi atandatu gusa Evode UWIZEYIMANA azaba ari Minisitiri w’Ubutabera n’intumwa nkuru ya Leta bityo ubu Minisitiri BUSINGYE Johnston w’ubutabera akaba arimo gushyushya intebe izicarwaho n’uyu mwana wo kwa MIRENGE KU NTENYO.
Nkeka ko tukivuga gutyo hari bamwe bashobora kuba baravuze ko twigerezaho none mu gihe Evode ataramara mu gihugu n’amezi abiri inama y’abaminisitiri imugize Umuyobozi wungirije wa komisiyo y’igihugu ishinzwe gukora amategeko.
Kugira ngo wumve uburemere bw’uyu mwanya ni uko nawe agiye kuri rwa rutonde rwa ba diregiteri jenerali akaba agomba guhita ahabwa imodoka nziza cyane yo mu bwoko bwa TOYOTA LAND CRUISER V8 yo mu Kagera igura Miliyoni Mirongo inani n’imisago akazajya anahembwa ya mafaranga duherutse kubandikira tubereka ukuntu bakwiye kuyagabanya bigiye kuri Kenya.
Nta gushidikanya mu minsi ibaze Evode azaba ari Minisitiri w’ubucamanza bwa KAGAME. Mu kiganiro Evode aherutse guha abanyamakuru i Kigali aho acumbitse muri La Palisse Nyandungu, abanyamakuru bamubajije niba acyemeza ko u Rwanda rutegekwa n’agatsiko k’amabandi kitwaje intwaro maze abasubiza agira ati :
« Kubivuga nibyo narabivuze ariko niba mwarabyumvise mukabyemera mukabiha agaciro ni akazi kanyu ibyo ntibindeba rwose njyewe Evode !!!! » Bishatse kuvuga ko yabivuze yikinira cyangwa yashukaga abaturage yababeshyaga ???????????? Dukomeze tubitege amaso turebe iyo byerekera.
Icyemezo cya 3 : MURANGWA Yussuf utegeka ikigo cy’gihugu gishinzwe ibarurishamibare(Statistics) yashyizwe mu nama y’ubutegetsi y’ikigo cy’imisoro n’amahoro
Inama y’abaminisitiri yo kuri uyu wa gatatu yongeye kugabira abo mu gatsiko imyanya uko babyumva ariko icyatangaje ni ukuntu umuyobozi w’ikigo cy’igihugu gishinzwe ibarurishamibare (NISR : National Institute of Statistics of Rwanda) yashyizwe mu bagize inama y’ubutegetsi y’ikigo cy’igihugu gishinzwe kwinjiza imisoro n’amahoro (RRA).
photo
Murangwa Yussuf
Uyu MURANGWA Yussuf niwe uherutse gutangariza abanyamakuru i Kigali ko mu bushakashatsi ikigo abereye ku isonga cyakoze basanze abana bagera kuri 44% bari munsi y’imyaka itanu y’amavuko barwaye Bwaki kubera imirire mibi mu miryango bavukamo.
Amakuru dufite aravuga ko MURANGWA Yussuf akimara gutangaza ibyavuye mu bushakashatsi akemeza ko abana bamazwe na BWAKI, Kagame ngo yaramutonganyije cyane avuga ko atazi politiki ngo kuko kuba yaravuze biriya yahaye urwaho ABAHUTU rwo kubona inzitwazo z’uko Leta ye ikora nabi kandi atari byo.
Kuba rero bamuhaye kujya mu nama y’ubutegetsi ya R.R.A mu ruhande rumwe harimo no kumunaniza kuko kuri Kagame ntabyo gukurikiza ibipimo fatizo by’ubushakashatsi ugomba gukora icyo agutegetse wabyanga ukicwa. MURANGWA Y. rero abaye nk’utegetswe gutambikiza kugira ngo bazamubaze byinshi bityo nabona bimunaniye azisezerere niyanga bazamunyuze mu gihome kuko byababaje cyane Kagame .
Umutungo wikubiwe na bamwe
Yaba iteka rya Perezida, yaba amateka y’abaminisitiri, yaba amategeko, amabwiriza n’ibindi… ntibyibanda ku birebana no gushyiraho abagize inama z’ubutegetsi bw’ibigo kuko atari umurimo ukenera ubwenge burenze urugero na tekiniki.
Gufata rero umuntu uyobora ikigo gikomeye ukamwongerera n’izo nshingano zindi bishobora gutuma yica akazi umusaruro ukaba mucyeya. Ahubwo biba bikwiye gusaranganya n’abandi bakabonaho bityo umunezero ukagera kuri bose cyangwa nibura kuri benshi.
Mu gusoza turakomeza kubararikira kuzabagezaho inkuru irebana n’uruzinduko rw’Abepisikopi b’u Rwanda bagomba kuzabonana na Papa Faransisiko i Vaticani kuwa Kane ku italiki 03 Mata 2014. Turimo kubibakurikiranira kuko ubu bamaze kugera i Roma bose mu ruzinduko twita AD LIMINA. Ntimuzacikwe rero.

Padiri Nzahoranyisingiza
shikamaye.blogspot.no
shikama ku kuri na Demukarasi(SKUD)
________________________________________________________________________

PS/ NKUSI Yozefu
Murakoze cyane Padiri, Imana ikomeze ibaturindire kugirango mukomeze kutumurikira. Akantu gato ngirango mbunganire kuri iyi nyandiko yanyu icukumbuye, ni uko mbere y'uko Michel MAKUZA asaba imbabazi, mukuru we Bernard MAKUZA yari yabwiye itangaza makuru ko Icyaha ari gatozi ntawe ugomba kuryozwa ibyo se cyangwa sebukwe yakoze! Ubu bushakashatsi rero burerekana ko aya magambo ashobora kuba yaravuzwe n'uyu mutegetsi amaze guhatirwa gusaba imbabazi ku mugaragaro na Kagame, maze akabyanga ariko murumuna we akabikora ngo yitamirire kabiri. Harahagazwe!!!

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355