Pageviews all the time

Kuki abaperezida b’u Rwanda bamenya ukuri mu minsi yabo ya nyuma ?/NKUSI Yozefu

Tuzakugwa imbere mutware
Ingoma yose igiyeho  mu Rwanda yivuga ibigwi, ikitaka ngo ibogoye igihugu kandi ikaba igiye kucyubaka ikakigira paradizo. Nyuma y’igihe gito gusa usanga abishyize ku butegetsi batangiye gusubiranamo bitana ibisambo, abanyamatiku n’andi mazina y’urukozasoni.Ibyo kugira igihugu paradizo birangirira aho, maze bagatangira kubaka akazu kagizwe n’abantu mbarwa barangajwe imbere no gusahura no kwikubira ibyiza by’igihugu bonyine.Nyuma y’igihe kitarambiranye Umuperezida atangira kuvumbura ko abari ku isonga ry’agatsiko yizeraga kurusha abandi bose ari abagambanyi. Igikurikira ni ukwica, gukenesha cyangwa kujujubya aba baba batakizewe.Iyi mikorere tuyisanga mu ngoma zategetse u Rwanda rumaze kuba Repubulika.

Kayibanda Gregoire
G. Kayibanda

Uyu muyobozi wategetse igihugu mu bihe bikomeye kurusha abamukurikiye ukurikije ibibazo by’ubukene byari mu gihugu yari ahawe kuyobora muri 1962 hakiyongeraho n’ikibazo cy’Inyenzi zatangiye gutera kuva mu kwezi k’Ukwakira 1962 kugeza mu Gushyingo 1967. Ikindi kibazo cyari ishyamirana hagati ya Butare na Gitarama ryaje kurangira mu mahoro muri 1963. Nyuma yaho haje kubaho ibyo MDR PARMEHUTU yaje kwigizayo abantu bose bitwaga ko bataye umurongo. Muri za 1969 kujyana hejuru, Kayibanda yatangiye gukoresha amagambo akakaye yerekana ko abo yari yizeyemo abafasha yabavumbuyemo abanzi n’abagambanyi: ba Rutemayeze, Induruburi, abantu barangwa na demagoji.

Habyarimana Yuvenali
J. Habyarimana

Uyu mugabo wakoze uko ashoboye ngo yunge abenegihugu, ntawahakana ko imbaga y’abanyarwanda ( usibye abari abayobozi muri Repubulika ya mbere) kuva  ku ya 5 Nyakanga 1973 itariki yafatiyeho ubutegetsi kugeza muri 1979 umwaka waburijwemo kudeta yagombaga kumukura ku butegetsi, abanyarwanda babanye neza ku buryo umuntu yavuga ko bazajya bibuka iki gihe nk’ukwezi kwa buki!Ntihateye kabiri, muri Kongere- ya 5 ya MRND ishyaka rya Habyarimana ryari ku butegetsi-  Habyarimana yerekana ko abo yari yizeyemo abafasha n’inshuti magara aribo banzi be kabuhariwe, ibi yabivuze hamaze gucaho ka animasiyo ko gususurutsa abari aho muri kongere bavuga bati « Habyarimana, Ramba, sugira, sagamba, turagushyigikiye» Yarabarebye agahinda karamwica maze aravuga ati: « Murambwira ngo muranshyigikiye muriho munjomba ibikwasi mu mugongo?» 

Pawulo Kagame
Perezida Kagame n'umuryango we

Uyu mugabo wateretswe mu Rugwiro n’ibihugu by’ibihangange nka USA, UK, Israel, Uganda, Ethiopia, Eritrea n’ibindi ntarondoye nyuma yo kumena amaraso y’inzirakarengane zitabarika,  abanyamerika ntibatindiganyije kwemeza ko we n’ikipe ye bazahindura ibintu mu karere u Rwanda ruherereyemo bakakagira paradizo.  Aho guhindura akarere paradizo ahubwo iyi kipe yagahinduye Gehenomu(Umuriro utazima)!Mu myaka 20 yose Kagame n’iyi kipe bamaze babeshya abanyarwanda ko bazanye amahoro na demukarasi, nyuma y’uko abagize ikipe batangiye gusubiranamo akenshi bapfa ibisahu byo muri RDCongo,ubu biragaragara ko Kagame yarangije kwiheba aho amariye kwibonera ko mu bamubwira ko bazamugwa imbere harimo ba Yuda Isikariyota benshi! Nkuko byagenze kuri Kinani, Kagame nawe yahishuye ko amaze kumenya ukuri ari muri Kongere ya FPR  kuri 31/8/2014 kuri petit stade ubwo yashimangiraga ibyo abanyarwanda bamaze imyaka 20 bavuga ku ishyaka abereye ku isonga. Uyu mutegetsi yiyemereye ubwe ko abarwanyashyaka ba FPR barangwa n’ Ubwirasi, ikinyoma, gutekinika, kwitaka wivuga ibigwi n’imyato,  kuba rutemayeze (opportunist), kutagira ibanga, gukwirakwiza ibihuha n’ibindi 

Kuki aba bagabo bose bavumbuye ukuri bashaje?
Impamvu yo kuvumbura ukuri hashize igihe kirekekire bituruka mu kwizera AKAZU cyangwa AGATSIKO kurusha kwizera rubanda bavuga ko bakorera. Kumva ko ababarinda bahembwa ibifranga by’umurengera akenshi bakaba ari nabo barinda umutekano w’agatsiko ababajya mu matwi babongorera amanywa n’ijoro ko ntaho umwanzi yamenera abambura ingoma kuko bafite ingabo z’Urumenesha. Kuba umugabo n’umugore binjiza amamiliyoni yahemba abakozi basanzwe muri leta 100 nkuko bimeze ubu muri Leta y’Agatsiko, Perezida Kagame yumva ko nta warenga kuri ibyo bifranga ngo amujombe ibikwasi kuko abikoze akabura umwanya agomba kugira ubwoba ko n’umugore we cyangwa umugabo we yawubura maze akagira ubwoba akareka gutenguha Kagame wamwimitse.
Tuzakugwa imbere mutware 
Nyamara nta kidasaza: umwenda twambara urasaza tukagura undi, umusatsi twameze ugasaza ukaba imvi, amenyo agasaza agakuka tugasigarana ibihanga, amaso agasaza ntabone, n’amatwi ntiyumve. Ibi ninako bigendekera abiyicaje ku ngoma, kuko ingoma yabo irasaza bamwe muribo b’inkwakuzi bakamenya ko ishaje igomba gusimbuzwa indi abandi bagasa na ya ndondogozi y’ururondwe yumiye ku mwite inka yarariwe cyera. Muri aba batamenya ko ingoma ishaje Perezida wa Repubulika aba ababereye ku isonga, maze bakamutaka bakamuramya bamubwira ko nta wundi wayobora u Rwanda kugirango bakomeze biyorere bya bifranga by’umurengera navuze hejuru. Aba rero b’inyaryenge bamenye ko ingoma ishaje nibo Perezida yita abanzi b’igihugu, abanyabinyoma, abanzi b’amahoro, ba Rutemayeze, Ibigarasha, amabyi, n’ibindi bitutsi by’urukozasoni byagiye bikoreshwa n’aba baperezida cyane cyane Kagame ukunda kwandagaza atitangiriye itama.

umucurabwenge wa  FPR
Ingaruka z’uku kutabona ukuri kare ngo bahindure ibintu bitaragera iwa Ndabaga bisa na ya magambo malayika aje agasanga intumwa za Yezu zireba hejuru nawe ngo ariho ajyanwa mu ijuru; maze ngo Malayika arababwira ati: « uko mumubonye agenda ni nako muzamubona agaruka». Ingoma z’u Rwanda nazo uko ziza giturumbuka ni nako zivaho giturumbuka kubera ko zidashyirwaho n’abaturage maze  ngo abe ari nabo zikorera.Ingaruka zabyo twese tukaba tuzizi.

NKUSI Yozefu
Shikamaye.blogspot.com
Shikama ku Kuri na Demukarasi(SKUD)



No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355